News Portal

काठमाडौँ उपत्यकामा तीन करोड लिटर खानेपानी थपियो

राससकाठमाडौं
३७८ पटक
काठमाडौं

भदौ ३, काठमाडौं – उपत्यकाको खानेपानी वितरण सञ्जालमा दैनिक तीन करोड लिटर पानी थप भएको छ । उपत्यकाका ७० हजार धारामा थप पानी जाने काठमाडौँ उपत्यका खानेपानी लिमिटेड आयोजना कार्यान्वयन निर्देशनालयले जनाएको छ । पानी वितरणको शुरुआत गर्दै सभामुख कृष्णबहादुर महराले पानीको अभावमा रहेका उपत्यकाका बासिन्दाका लागि राहत मिल्ने बताए ।

उनले भने, “धेरै नागरिक अझै स्वच्छ खानेपानीको पहुँच बाहिर छन् । संविधानको मौलिक हकका रुपमा स्थापित स्वच्छ खानेपानीको अधिकार सुरक्षित गर्न सरकारले ध्यान दिनुपर्छ ।”

खानेपानीमन्त्री विना मगरले यसअघि हप्तामा एक दिन दुई घण्टा पानी वितरण गरिएकामा आजै देखि हप्तामा पाँच दिन दुई घण्टा पानी दिइने प्रतिबद्धता जनाएकी छिन् । उनले लिमिटेडका दुई लाख ७० हजार धारामा पानी दिन पहल गरिने बताइन् ।

मन्त्रालयका सचिव गजेन्द्रकुमार ठाकुरले विश्व स्वास्थ्य सङ्गठनको मापदण्ड अनुसारको पानी प्रशोधन गरी वितरण हुने बताए । निर्देशनालयका आयोजना निर्देशक तिरेशप्रसाद खत्रीले थपिएको पानीले दैनिक आठ लाख ४० हजार जनता लाभान्वित हुने बताए ।

२०७५ भदौ ३ गते प्रकाशित

प्रतिकृया दिनुहोस्