News Portal

कहिलेदेखि खुल्दैछन लामो दूरीका यातायात ? यस्तो व्यवसायीको तयारी

मोटिभेटन्यूज संवाददाता
१३३ पटक

काठमाडौं – यातायात व्यवसायीहरु लामो दूरीका सवारी साधनहरु चलाउन तयार भएका छन । नेपाल यातायात व्यवसायी राष्ट्रिय महासङ्घ लगायतका व्यवसायीले सार्वजनिक यातायात सञ्चालन गर्नका लागि तयारी गरीरहेका छन ।

सरकारले बैङ्क किस्ताको म्याद थप र पुनर्कर्जा लगायतको व्यवस्था गरेर उनीहरूको माग पूरा गरेपछि व्यवसायी आफ्ना सवारी साधन मर्मतसम्भारमा जुटेका छन । सोमबार यातायात व्यवस्था विभागसँग छलफल गरी उनीहरुका माग अनुसार सरकारले सहुलिएत दिने सहमति भएको थियो ।

तर व्यवसायीहरुले कहिलेदेखि यातायात सञ्चालन गर्ने भन्ने कुराको कुनै निश्चित समय तोकिएको छैन । लामो र मध्यम दूरीका सार्वजनिक यातायात सञ्चालन गर्ने सहमति भएको छ । महासङ्घ र विभागबीच सोमबार भएको छलफमा लामो तथा मध्यम दूरी खुलाउन उच्चस्तरीय समितिलाई निर्णय गर्न विभागले तत्काल सिफारिस गर्ने सहमति भएको छ ।

यातायात मजदुरको एक लाखको कोरोना बीमामा सरकारले ५० प्रतिशत र यातायात व्यवसायीले ५ प्रतिशत अनुदान गर्ने सहमति भएको महासङ्घका वरिष्ठ उपाध्यक्ष विजय स्वाँरले जानकारी दिए । कोरोनाका कारण यातायात क्षेत्रमा कुनै पनि किसिमको मानवीय दुर्घटना भएमा क्षतिपूर्तिका लागि कोष स्थापना गर्न सम्बन्धित मन्त्रालयलाई विभागले पहल गर्ने भएको छ ।

यातायात मजदुरलाई आवश्यक स्वास्थ्य उपकरणको व्यवस्था व्यवसायीले नै गर्ने तर यात्रुको स्वयंले व्यवस्था गर्नुपर्ने सहमति भएको छ । उपत्यकाका बस स्टेसनमा स्वचालित सेनिटाइजेसन काठमाडौँ महानगरपालिकाले राख्ने भएको छ तर कहिलेदेखि गाडी सञ्चालन गर्ने भन्ने सवालमा आज (मङ्गलबार) पत्रकार सम्मेलन गरेर जानकारी दिने महासंघले जनाएको छ ।

२०७७ साउन ६ गते प्रकाशित

प्रतिकृया दिनुहोस्