News Portal

निर्मला हत्याकाण्ड : अनुसन्धानमा गम्भीर लापरवाही गरेको भन्दै थप दुई प्रहरी निलम्बित

मोटिभेटन्यूज संवाददाताकाठमाडौं
३१२ पटक
काठमाडौं

असोज २२, काठमाडाैं-  प्रहरी प्रधान कार्यालयले कञ्चनपुरकी १३ वर्षीया बालिका निर्मला पन्तको बलात्कार र हत्याको अनुसन्धानमा गम्भीर लापरवाही गरेको भन्दै थप दुई प्रहरीलाई निलम्बन गरेको छ ।

प्रहरी प्रवक्ता तथा प्रहरी वरिष्ठ उपरीक्षक शैलेश थापा क्षेत्रीका अनुसार निर्मला पन्तको बलात्कार र हत्यासम्बन्धमा अनुसन्धानमा संलग्न प्रहरी कर्मचारीहरुको भूमिका छानविन गर्न प्रहरी प्रधान कार्यालयबाट गठित छानविन समितिको सिफारिसमा थप दुई जनालाई निलम्बन गरिएको हो । निलम्बित हुनेमा जिल्ला प्रहरी कार्यालय कञ्चनपुरमा कार्यरत घटनास्थल अनुसन्धान अधिकृत प्रहरी नायव निरीक्षक हरसिंह धामी र प्रहरी जवान चाँदनी साउद छन् ।

उनीहरुले घटनास्थल अनुसन्धानको क्रममा गम्भीर लापरवाही गरेको पाइएकाले प्रहरी नियमावली २०७१ को नियम ११५ को उपनियम ६ (क) र (ग) अनुसार निलम्बन गरिएको प्रहरी प्रवक्ता क्षेत्रीले जनाएका छन् ।

यो सँगै निलम्बनमा पर्ने प्रहरी अधिकारीको संख्या ७ पुगेको छ। यसअघि कञ्चनपुरका तत्कालीन एसपी डिल्लीराज विष्ट, डिएसपी अंगुर जिसी र ज्ञानबहादुर सेटी, प्रहरी निरीक्षक जगदीश भट्ट र एकेन्द्र खड्का, प्रहरी सहायक निरीक्षक रामसिंह धामी निलम्बनमा परेका थिए।

 

२०७५ असोज २२ गते प्रकाशित

प्रतिकृया दिनुहोस्