News Portal

को हुन अमेरिकी उपराष्ट्रपति कमल ह्यारिस, किन मनाइयो भारतमा विजय जुलुस ?

मोटिभेटन्यूज संवाददाता
१४७ पटक

काठमाडौं – अमेरिकामा पहिलो पटक महिला उपराष्ट्रपति बन्ने निश्चित भएको छ । कमल ह्यारिस अमेरिकाको ४६ औं उपराष्ट्रपति बन्ने लगभग पक्का पक्की भएको छ ।

अगष्ट महिनामा अमेरिकाको डेमोक्रेटिक पार्टीले उनलाई उपराष्ट्रपतिको उम्मेदवार बनाउने निर्णय गरेको थियो । त्यसअघि उनी राष्ट्रपतिको उम्मेदवार बन्ने सोचमा थिइन् । तर, उनको उम्मेदवारीको दौड सकिएपछि बाइडनले उनलाई साथै लिएर निर्वाचन लड्ने निर्णय गरेका हुन् ।

कमला ह्यारिस पहिलो अश्वेत महिला उपराष्ट्रपति बन्नुभन्दा उनले धेरै विधामा पहिलो बन्ने रेकर्ड राखिसकेकी छिन् । कमला ह्यारिस अमेरिकाका पूर्वराष्ट्रपति बाराक ओबामाको निकट मानिन्छिन् । उनलाई बाराक ओबामाले पनि धेरै निर्वाचनमा समर्थन गरेका थिए । जसमध्येको एक निर्वाचन सन् २०१६ को सिनेटको निर्वाचन पनि हो । ओबामा अमेरिकाको पहिलो अश्वेत राष्ट्रपति हुन् । उनकै पाइला पछ्याउँदै अहिले ह्यारिस पहिलो अश्वेत उपराष्ट्र बन्ने पक्का भएको छ ।

कमला ह्यारिसका पिता जमैकाका थिए भने आमा भारतीय नागरिक थिइन् । उनका पिता डोनाल्ड ह्यारिस जमैकाका अश्वेत नागरिक हुन् । उनी अर्थशास्त्रका प्राध्यापक थिए । ह्यारिसकी आमा श्यामला गोपालन भारतको चेन्नईमा जन्मिएकी क्यान्सर रिसर्चर तथा नागरिक अधिकारवादी अभियान्ता हुन् । यद्यपि कमला ह्यारिस आफूलाई केवल अमेरिकी भन्न रुचाउँछिन् ।

कमला ह्यारिसको जन्म सन १९६४ मा अमेरिकाको क्यालिफोर्नियास्थित अकल्याण्डमा भएको थियो । उनी सात वर्षको हुँदा उनका बाबुआमाको सम्बन्धविच्छेद भएको थियो । त्यसपछि उनी र उनकी बहिनी आमासँगै बस्न थाले । श्यामलाले उनीहरुलाई भारतीय संस्कार र हिन्दू संस्कृति सिकाउँथिन् । कमला ह्यारिस १२ वर्षको हुँदा क्यानडाको क्युबेक गएका थिए ।

क्युबेकमा बस्दा उनले फ्रान्सेली भाषा सिक्ने मौका पाएकी थिइन् । साथै उनीप्रतिको राजनीतिक अभिरुचि पनि जागृत भएको थियो । त्यहाँ उनले घरधनीहरुले आफ्नो मैदानमा छिमेकका बालबालिकाहरुलाई खेल्न नदिने गरेको विषयमा आन्दोलन गरेकी थिइन् ।

ह्यारिसले क्यानडाको वेस्टमाउन्ट हाइस्कुलमा अध्ययन गरेकी थिइन् । तर, पछि उनी पुनः अमेरिका फर्किएर क्यालिफोनिर्याको होवार्ड युनिभर्सिटीमा अध्ययन गरेकी थिइन् । उनी लिबरल आर्टस् काउन्सिलका लागि निर्वाचित भएकी थिइन् र डिकेट टोलीमा सामेल भएकी थिइन् । सो क्रममा उनले राजनीति शास्त्र र अर्थशास्त्रको अध्ययन गरेकी थिइन् । अध्ययन पश्चात् उनी कानुनको अध्ययनका लागि युनिभर्सिटी अफ क्यालिफोर्नियामा गएकी थिइन् ।

राजनीतिक करियर

सन् १९९० मा कमला ह्यारिस क्यालिफोर्नियाको अलामेडाको सहायक डिस्ट्रिक अधिवक्ता बनेकी थिइन् र राजनीतिक करियरमा उनको यो पहिलो पाइला हो । सन् १९९८ मा उनी सन्फ्रान्सिस्को डिस्ट्रिक एटोर्नी कार्यालयको करियर क्रिमिनल युनिटकी म्यानेजिङ एटोर्नी (अधिवक्ता) बनेकी थिइन् ।

सन् २००३ मा उनी आफ्ना पुराना हाकिमलाई हराउँदै सन्फ्रान्सिस्कोको शीर्ष अधिवक्ता बनेकी थिइन् । उनले आफ्नो कार्यकालमा केही राम्रो काम गरेपनि प्रहरी अधिकारीको हत्यामा संलग्नलाई मृत्युदण्ड दिलाउने प्रयास नगरेको भन्दै उनको आलोचना भएको थियो ।

ह्यारिसले आफ्नो राजनीतिक सक्रियता कायम राखिन् र सन् २०१० मा उनी क्यालिफोर्नियाको महान्यायाधिवक्तामा निर्वाचित भइन् । यो पदमा पुग्ने उनी पहिलो अश्वेत र महिला पनि हुन् ।

सन् २०१६ मा ह्यारिस क्यालिफोर्नियाबाट संसद्मा प्रतिनिधित्व गरिसकेका लोरेट्टा सान्चेजलाई हराउँदै सिनेटमा आफ्नो प्रतिनिधित्व सुनिश्चित गरेकी थिइन् । उनी सिनेट प्रवेश गर्ने दोस्रो अश्वेत महिला हुन् ।

सन् २०१४ मा ह्यारिसले अधिवक्ता डोउग्लास इम्होफसँग विवाह गरेकी थिइन् । उनीहरुका दुई सन्तान छन् ।

भारतमा खुशियाली

भारतको केरला मामाघर भएकी ह्यारिस निर्वाचित हुनैलाग्दा भारतमा खुसीयाली मनाउन थालिएको छ।

उनकी आमा श्यामला गोपालन केरलाकी हुन्। ह्यारिस आफैँ आफ्नी मामाघरकी हजुरआमाबाट एकदमै प्रभावित मानिन्छन्। उनी उपराष्ट्रपतिको दौडमा छँदा भारतको केरलामा उनको जितका लागि पूजाआजा पनि गरिएको थियो।

भारतमा कांग्रेस नेता रञ्जन चौधरीले भारत सरकारले ह्यारिसको विजयको शानदार र भव्य स्वागत गर्नुपर्ने बताएका छन्। मतगणना भइरहेका पाँचमध्ये चार राज्यमा डेमोक्र्याटिक उम्मेदवार जो बाइडेनले अग्रता लिइरहँदा कमला ह्यारिस अमेरिकी उपराष्ट्रपति बन्ने पक्कापक्कीजस्तै भएको छ।

उनी सीमान्तकृत समुदायकी पहिलो अमेरिकी उपराष्ट्रपति पनि हुनेछिन्।

२०७७ कात्तिक २३ गते प्रकाशित

प्रतिकृया दिनुहोस्