News Portal

निर्वाचन आयोग निवार्चनको तयारीमा, के–के आयो त छलफलको परिणाम ?

मोटिभेटन्यूज संवाददाता
४४ पटक

काठमाडौं – निर्वाचन आयोगले यही माघ १५ गते मतदाता नामावली प्रकाशित गर्ने एवम् १६ र १७ गते त्रुटि भए सच्याउन निवेदन दिन लगाउने, राजनीतिक दलका प्रतिनिधिहरूसँग आइतबार भएको छलफलमा प्रस्ताव गरेको छ ।

आउँदो वैशाख १७ र २७ गते मध्यावधिक चुनावको घोषणा भएकाले त्यसबारे छलफल गर्न आयोगले राजनीतिक दलका प्रतिनिधिहरूसँग छलफल गरेको आयोगका प्रवक्ता राजकुमार श्रेष्ठले जानकारी दिए । यस्तै बैठकमा मतदान केन्द्रबारे पनि छलफल भएको राजनीतिक दलका प्रतिनिधिहरूले बताएका छन ।

छलफलमा सहभागी नेकपाको दाहाल–नेपाल समूहका नेता राजेन्द्र पाण्डेले छलफलमा मतदाता नामावली प्रकाशन, त्रुटि सच्याउन निवेदन दिने, मतदान केन्द्रलगायतबारे छलफल भएको तर अहिले चुनाव हुने अवस्था नरहेकाले चुनावको नाममा अनावश्यक खर्च नगर्न सुझाव दिएको बताए ।

प्रतिनिधि सभा विघटनको मुद्दा अदालतमा विचाराधीन अवस्थामा रहेको र संसद पुनस्र्थापना या चुनावबारे अहिले नै निश्चीत नभइ सकेकाले चुनावको तयारी गर्नु उचित नहुने कुरा आफूहरूले राखेको नेता पाण्डेले जानकारी दिए ।
यस्तै न्याय परिषद्ले सरुवा गर्नुपर्ने आयोगको कर्मचारीलाई सरकारले सरुवा गरेको विषयमा पनि आफूहरूले कुरा उठाएको उनले बताए । चुनाव नहुने र अहिलेकै अवस्थामा निर्वाचन आयोगले निष्पक्ष चुनाव गराउन पनि नसक्नेबारे आफूहरूले ध्यानाकर्षण गराएको नेता पाण्डेको भनाइ छ ।

आउँदो वैशाख १७ र २७ गते मध्यावधिक चुनाव गर्ने घोषणासहित प्रधानमन्त्रीको सिफारिसमा राष्ट्रपति विद्यादेवि भण्डारीले गएको पुस ५ गते प्रतिनिधि सभा विघटनको घोषणा भएको थियो । त्यसपश्चात आयोग चुनावको तयारीमा जुटेको छ ।

 

२०७७ माघ ४ गते प्रकाशित

प्रतिकृया दिनुहोस्