News Portal

निर्मला हत्या प्रकरण : मार्ने डर देखाएपछि आरोप स्वीकारेँ : विशाल चौधरी

मोटिभेटन्यूज संवाददाताकाठमाडौं
२९४ पटक
काठमाडौं

पौष ८, महेन्द्रनगर – निर्मला पन्तको बलात्कार र हत्याप्रकरणको अनुसन्धानका लागि पक्राउ गरिएका विशाल चौधरीलाई प्रहरीले रिहा गरेको छ । अनुसन्धानका लागि भन्दै नेपाल प्रहरीको केन्द्रीय अनुसन्धान ब्यूरोले पक्राउ गरेका कञ्चनपुर भीमदत्त नगरपालिका १८ सालघारीका १६ वर्षीय विशाल चौधरीलाई शुक्रबार रिहा गरेको हो।

परिवारका सदस्यहरुलाई भने शनिबार मात्रै जिम्मा लगाइएको छ । प्रहरीले शुक्रबार बालबालिका खोजतलास समन्वय केन्द्रको जिम्मा लगाएर छोडेको थियो  । केन्द्रले शनिबार काठमाडौंबाट महेन्द्रनगर ल्याएर परिवारको जिम्मा लगाएको हो । ‘हिजो प्रहरीले हाम्रो जिम्मा लगाएर छोडेको थियो’, बालबालिका खोजतलास केन्द्रका कार्यक्रम सहायक सन्तोष चन्दले भने,‘ आज बिहान प्लेनबाट ल्याएर हामीले परिवारको जिम्मा लगाएका छौं ।’

शनिबार दिउँसो जिल्ला प्रहरी कार्यालय कञ्चनपुरको रोहबरमा विशाललाई परिवारको जिम्मा लगाइएको हो । विशालका बुबा वीरवहादुर चौधरीले जिम्मा लिएका हुन् । ‘मेरो निर्दोष छोरालाई यति दिनसम्म हिरासतमा राखेर यातना दिइयो’, वीरबहादुरले भने, ‘उसलाई हिरासतमा राखेर पनि डर देखाइएको रहेछ ।’

जिल्ला प्रहरी कार्यालय कञ्चनपुरका प्रहरी प्रवक्ता डीएसपी कृष्णराज ओझाले शनिबार प्रहरी कार्यालयको रोहबरमा बालबालिका खोजतलास केन्द्रले परिवारको जिम्मा लगाएको बताए । उनले अनुसन्धानमा प्रहरी सुक्ष्म रुपले नै लागिरहेको बताए । प्रहरीले विशाल चौधरी र हिरासतमै रहेका अर्का प्रदिप रावलको डीएनए परीक्षण समेत गरेको थियो ।

डीएनएको रिपोर्ट नमिलेको यसअघि नै खबर बाहिरी सकेको छ । तर कञ्चनपुर प्रहरीले भने अहिलेसम्म रिपोर्ट आधिकारिक जिल्लासम्म नपुगेको जनाएको छ । प्रहरी स्रोतका अनुसार विशालको डीएनए नमिलेपछि उनलाई रिहा गरिएको हो ।

यता निर्मला पन्तको बलात्कार र हत्या प्रकरणको अनुसन्धानका क्रममा पक्राउ परेका विशालले आफूलाई डरत्रास देखाएपछि आरोप स्वीकारेको बताएका छन् ।

शुक्रबार रिहा भएपछि शनिबार महेन्द्रनगर पुगेका विशालले प्रहरीले मानसिक यातना दिएकै कारण आफूले स्वीकार गरेको बताए । ‘प्रदिपले स्वीकारी सक्यो त पनि स्वीकार नत्र राम्रो हुन्न भनेर डर देखाइयो’, शनिबार प्रहरी कार्यालयमा पत्रकारमाँझ उनले भने, ‘मारिदिन्छौ भन्ने जस्ता धम्कीले मलाई पनि डर लाग्यो र आरोप स्वीकारेको हुँ ।’ उनले प्रहरीले कञ्चनपुरमै पक्राउ गरेपछि आफूलाई डर देखाएको बताए ।
अन्नपूर्णबाट

२०७५ पुष ८ गते प्रकाशित

प्रतिकृया दिनुहोस्