News Portal

आइतबार ठूलो हावाहुरी चल्छ भनेर किन मौसमविद्ले पूर्वानुमान गर्न सकेन

मोटिभेटन्यूज संवाददाताकाठमाडौं
९२६ पटक
काठमाडौं

चैत्र १८ काठमाडौँ – पछिल्लो समयमा मौसमविदको भविष्यवाणी मिल्दै गएकोमा आइतबारको घटनाले भने मौसमको भविष्यवाणीप्रति प्रश्न उठेको छ । आइतबार बारा र पर्सामा ठूलो धनजनको क्षति हुने गरी भीषण हावाहुरी चल्यो । तर मौसमविदले यति ठूलो हावाहुरी चल्छ भनेर पूर्वानुमान गरेका थिएनन् ।

ठूलो हावाहुरी आउँदैछ भनेर पूर्वानुमान गर्न समस्या हुने गरेको मौसमविदको भनाइ छ । मौसमविद मिनकुमार अर्यालका अनुसार प्रविधिको अभाव र भौगोलिक अवस्थाका कारण ठूलो हावाहुरीको पूर्वानुमान गर्न गाह्रो हुने बताए ।

तर सोमबार हिजोजस्तो ठूलो हावाहुरी आउने सम्भावना भने नभएको उनको भनाइ छ । पहाडी भेग र पूर्वी तराईका केही ठाउँमा मेघ गर्जन र हावाहुरी सहित पानी पर्ने सम्भावना रहेको उनले बताए  ।

नेपालमा सबै खालका मौसमको पूर्वानुमान गर्ने क्षमता नभएकाले आइतबार तराईमा ठूलो हावाहुरी आउने अनुमान गर्न नसकिएको उनले बताए  । नेपालमा मौसमको पूर्वानुमान गर्ने मोडलले सबै खालको मौसमको पूर्वानुमान गर्न नसक्ने तथा नेपालको भौगोलिक बनावटका कारण पनि मौसम पूर्वानुमानमा समस्या हुने गरेको उनको भनाइ छ ।

हावाहुरीको सम्भावना देखिए पनि कति ठूलो र कति सानो भन्न कठिन हुने गरेको मौसमविद् अर्यालले बताए  । आइतबार पनि सामान्य हावाहुरी आउनसक्ने सम्भावना मोडेलले देखाए पनि अनपेक्षित रुपमा ठूलो हावाहुरी आएको उनले बताए ।

२०७५ चैत १८ गते प्रकाशित

प्रतिकृया दिनुहोस्